Za serbske ludowe zastupnistwo
Für eine sorbische/wendische Volksvertretung

Pósejźenje Serbskego sejma z dobrymi wunoskami

Dnja 12.01.18 jo se Serbski sejm prědny raz w Dolnej Łužycy zmakał, w bergarskem domje we Wětošowje.

Zachopnje jo šołta Bengt Kanzler Serbski sejm pśiwitał do swójogo města, kótarež jasnje huznajo, až pśisłuša serbskemu sedleńskemu rumoju a se na wšakoraki part angažěrujo. Wón jo husoko gódnośił bazodemokratisku formu sejma, jo žycył móc a raźenje, jo zwólniwy se hobźěliś, a jo napominał do jadnoty akterow pśi wótgłosowanju a za zgromadnu harmonizaciju, aby serbski lud měł mócny głos.

W dopołudnjejšem workshopu su se pśeddiskutěrowali wšakorake aspekty jadnańskego pórěda, kótaryž su wótpołudnja finalizěrowali a hobzamknuli, a z tym jo se nachylny jadnański póřed narownał. Wón hopśimjejo wjele inowatiwnych, demokratiju zmócnjecych elementow. Do togo słuša huznaśe ku na konsens orientěrowanemu zaźarženjeju (z eksplicitnym wzdaśim frakcijow a za wěcownu město na wósobiny wusměrjoneju komunikaciju) kaž tež ku serbskima rěcoma bźez huzamknjenja wótpósłańcow, kótarež rěc njehuměju. Wótpósłańce maju w zakładnych pšašanjach pšawo na konstruktiwne weto. We wótběgach hutwórjenja měnjenjow a rozsudow zawěsćujo se połna transparenca, a wšykne zajmce su kaž wótpósłańce kazane, aby se direktnje hobźělili na źěłabnosći Serbskego sejma a jogo huběrkow.

Take mócne zawězanje su pominali teke pśibytne gósći, kótarež njekśě byś jano turnosowe wuzwólowarje, ale kśě hušej togo zapódaś swójske mysli a perspektiwy.

Wótpowědujucy jadnańskemu pórědoju jo se zasajźił prezidiji, kótaryž zawěsćijo źěłowu zamóžnosć sejma, a Sandra Wylemowa, Jan Kósyk a Aleksander Pólk su se huzwólili ako cłonki.

Hušej togo jo se na bazy diskusijow wó zaměrach a źěłowych śěžyšćach sejma hutwóriło pěś huběrkow:

  1. Institucionalizěrowane hobtwarźenje cełoserbskego zgromaźeństwa a jogo pśipóznaśe ako zjawna korporacija, huwójowanje kolektiwnych a sampóstajowańskich pšawow kaž jich financěrowanje jo źěłowy nadawk huběrka hustawa a pšawo.
  2. Zachowanje a dalejhuwiśe serbskeje rěcy a kultury, huspěšne rěcne kubłanje wót bujki až do bórow ako tež rewitalizacija rěcnych rumow su zaměry huběrka kubłańska a kulturna awtonomija, kótaryž se procujo wó zgromadne źěło wšyknych na tom pólu statkujucych akterow a wó zgromadne huźěłanje konceptow a jich zhopšawźenje.
  3. Zadoranje tšuśa dalšnych žywjeńskich rumow kaž tež aktiwne konstruktiwne sobuźěło na wótpowědnych městnach, aby Łužyca se wjadła do nowego rozkwiśenja, to jo pśedmjat huběrka za regionalne sobupóstajenje a góspodarstwo.
  4. Wó zawěsćenje šyrokeje informacije cełego luda, wó transparencu a intensiwne zaśěgnjenje běrgarjow kaž tež wó mjazynarodne kontakty a nawabjenje darow póstara se huběrk za zjawnostne źěło z eksterneju komunikaciju na pśikład pśez casnikarstwo a nowe medije.
  5. Wó elementarne źěłowe zakłady póstara se IT-huběrk.

Huběrki su něto ze źěłom zachopili, na sobuźěle zajmowane bergarki a bergarje pśizjawiju se pšosym pśez info@serbski-sejm.de.

W statemenśe pomina Serbski sejm pśi góźbje aktualnego nowohobsajźenja załožboweje rady Załožby za serbski lud, aby se zestawa załožboweje rady reforměrowała wótpowědnje mjazynarodnje pśipóznatym zasadam za šćit mjeńšynow. Do togo se licy rozšyrjenje załožboweje rady wó najmnjej styrich serbskich cłonkow, aby se zawěsćiła serbska majorita a aby k dalšemu mjazy górno- a dolnoserbskimi cłonkami se hutwóriła rownolicbnosć.

Hušej togo jo se na kšomje sejźenja wózjawiło, až jo se financěrowanje wólby do Serbskego sejma huspěšnje zakóńcyło. Z darow w husoknosći hušej 23.000 € jo zwóstał samo mały huzbytk za trěbne wěcowne kosty běžeceje źěłabnosći sejma. „Z tym jo widobnje, až zwólniwosć z luda Serbow k demokratiskim změnam jasnje pśesegajo prozne huznaśe a mimo cesnoamtskich procowanjow hobstoj w luźe tež nabejna gótowosć za financielne pódeprěśe projekta!“, tak Měrćin Schneider-Krawc.

Termin a městnosć pśiducego pósejźenja jo dnja 09.02.2019 we Wórjejcach.

Slědk